U.S. Department of Labor Blog
Jwenn lavi miyò pa fasil. Sa ki te gen plis enpak pou Kimberly Rush, se yon kat debi pou achte gazolin.
Li te fè plis pase ventan ap travay nan restoran ak nan konpayi ki bay sèvis manje. Lavi l te vin boulvèse lè li te oblije rete izole pandan pandemi an, akoz tretman li t ap resevwa pou lesemi. Li pa t gen konje peye ni konje maladi.
Men sa li esplike: “Mwen t ap travay chak wikenn, chak jou ferye”.
Li te gen anpil difikilte pou l jwenn ase tan pou l ale nan randevou onkoloji l yo, nan travay li nan yon ti restoran Safeway ak nan yon pwogram pou aprann konekte fil elektrik li t ap suiv nan Mesa Community College nan vil Phoenix, ki te nan yon distans 45 minit ak kote l te rete a.
Jwenn yon fòmasyon pwofesyonèl pou chanje lavi li se yon bagay ki te koute l chè anpil, e se pa kòb sèlman li te peye pou sa. Yon nuit, li te dòmi nan yon machin pou li te ka gen ase tan pou l ale kay doktè, nan travay li ak nan lekòl la. Li te konn mete sache glas nan yon zorye yo konn itilize nan avyon yo pou jwenn soulajman anba chalè dezè a.
Kimberly di konsa, “Mwen te santi m about nan domèn fizik, espirityèl ak emosyonèl.”
Byenke chak pa li te fè pou l vanse te lou anpil, li te jwenn èd, paske fòmasyon li t ap suiv la se yon fòmasyon li te jwenn grasa Fresh Start Women’s Foundation, ki se yon òganizasyon ki benefisye pwogram Depatman Travay la ki rele fi nan aprantisaj ak nan metye ki pa tradisyonèl (Women in Apprenticeship and Nontraditional Occupations, WANTO).
Lòt avantaj li te jwenn, se patisipe nan salon anplwa pou li ka rankontre anplwayè, jwenn yon preparasyon pou antretyen anbòch pou li pa t pè pale avèk konpayi tankou Pacific Scientific (yon konpayi ki te anboche l e kote li fèk jwenn yon pwomosyon), epi resevwa yon kat debi li te ka itilize pou mete gazolin nan machin li pou tout gwo deplasman sa yo.
Rush di konsa, “Lè ou gen kat sa a pou mete gazolin nan machin ou e pou fè makèt, ou ka respire pi fasil. Mwen pa bezwen bay tèt mwen pwoblèm pou bagay sa yo kounye a.”
Depi kòmansman administrasyon Biden-Harris la, Depatman Travay la te renouvle angajman li te pran pou ofri pwogram sibvansyon ki ede travayè yo suiv yon pakou pou yo jwenn bon djòb, tankou sibvansyon WANTO ki te ede Kimberly a.
Nou itilize kòb nou genyen an pou n bati yon enfrastrikti opòtinite, ki se yon seri sistèm ki mache ansanm pou ede travayè yo jwenn bon djòb. Epitou, nou itilize prensip pou bon djòb nou yo pou finanse yon seri pwojè ki gide travayè yo pou yo jwenn djòb ki ofri bon salè, pou yo ka an sekirite nan anviwònman travay la e pou yo resevwa benefis ki ka chanje lavi yo, tankou swen sante, retrèt ak gad timoun.
An 2024, grasa prensip sa yo, nou te pibliye plizyè opòtinite finansman diskresyonè ki reprezante plis pase 1.2 milya dola. Sibvansyon sa yo gen ladan yo 6 milyon dola anplis nan pwogram WANTO a, san wete yon lòt sibvansyon Fresh Start te itilize.
Men kèk lòt envestisman ki fèt nan envestisman pou bon djòb ak opòtinite a:
Prèske 13 milyon dola pou soutni patenarya piblik-prive ki kreye pou amelyore kalite travay yo nan kèk sektè ki enpòtan men ki konn neglije, tankou sektè swen sante a, sektè otèl yo ak travay pote sekou a.
40 milyon dola pou pwogram ki pa fèt nan orè lekòl yo ouvè pou prepare e pou ede jèn yo jwenn bon djòb, kote sibvansyon yo la pou kouvri depans ki fèt pou transpò ak lòt depans ki nesesè nan lavi chak jou a.
Prèske 50 milyon dola pou ede travayè nan zòn andeyò yo jwenn bon djòb ki peye omwen $15 pou chak èdtan, san wete aksè nan sèvis gad timoun ak transpò pou anyen pa anpeche travayè yo jwenn bon djòb nan zòn ki andeyò yo.
Prèske 200 milyon dola antanke sibvansyon YouthBuild ki fòme jèn yo pou yo jwenn bon djòb atravè pwojè konstriksyon lojman ki abòdab, ak yon nouvo egzijans pou benefisyè sibvansyon yo travay avèk anplwayè yo apre pwogram nan pou yo ofri travay ki respekte prensip pou bon djòb yo.
Plis pase 330 milyon dola pou ede granmoun yo okipe pwòp tèt yo atravè yon seri travay ki peye nan òganizasyon kominotè yo, ak nouvo egzijans pou ogmante kantite bon djòb ki disponib pou travayè ki pi aje yo.
Genyen anpil nan pwogram sa yo ki pa nouvo. Genyen nan yo ki la depi plizyè dizèn ane, e genyen ki menm la depi plizyè jenerasyon. Diferans lan se priyorite yo: vini ak yon seri opòtinite fòmasyon ak travay ki bon pou travayè yo ak fanmi yo.
Kimberly te santi diferans sa a. Grasa WANTO, li pa jis fè yon ti degaje ankò. Li touche yon bon salè epi li jwenn bon benefis nan yon travay li renmen fè, epi li gen anpil tan pou l planifye yon seri aktivite tankou yon vwayaj li pral fè nan yon machin kanping avèk fanmi li nan Bearizona, ki se yon pak kote gen anpil bèt sovaj.
Men sa li esplike: “Se kòm si m te genyen yon lavi aplentan ak yon travay amitan. Mwenn jwenn ogmantasyon salè otomatikman.”
Nick Beadle se konseye pou politik pou Good Jobs Initiative la
