U.S. Department of Labor Blog
Semèn pase, Komite Nasyonal pou Relasyon ak Travayè yo (National Labor Relations Board, NLRB) te pibliye yon seri done ki montre gen de fwa plis petisyon pou yo vote pou jwenn reprezantasyon pa mwayen sendika pase nan ane fiskal 2021. Sa reprezante yon gwo ogmantasyon paske se 1,638 petisyon yo te voye nan ane fiskal 2021, men se 3,286 yo te voye nan ane fiskal 2024. Prezidan Biden fè konnen se yon bon nouvèl, paske “lè sendika yo pwospere, tout travayè yo pwospere e se tout ekonomi a ki jwenn byenfè.”
Non sèlman kantite petisyon pou travayè yo jwenn reprezantasyon pa mwayen sendika yo ogmante, men tou sondaj ki fèt yo ak lòt etid kontinye montre se premye fwa gen anpil moun ki enterese nan sendika konsa depi plizyè dizèn ane. De tyè nan piblik la soutni sendika yo epi se jèn yo ki plis soutni yo pase tout lòt moun. Etid yo fè yo montre gen plis pase mwatye travayè ki pa gen sendika ki t ap vote pou gen yon sendika nan travay yo. Sa vle di gen omwen 60 milyon travayè ki ta renmen gen yon sendika men ki poko gen youn akoz yon seri obstak ak pwoblèm nan lwa yo.
Non sèlman kantite petisyon yo ogmante, men tou kantite viktwa sendika yo ranpòte kont konpayi yo ap ogmante. Mete sou sa, gen plis moun ki patisipe nan sendika yo, avèk 500,000 travayè siplemantè ki enskri nan de ane ki sot pase yo. Prèske 50,000 travayè ki elèv nan inivèsite yo te vote pou kreye sendika nan ane ki sot pase yo.
Se yon bagay ki pozitif anpil lè travayè yo ap òganize tèt yo, men ranpòte laviktwa nan yon eleksyon pou kreye yon sendika se premye etap la sèlman. Travayè yo toujou gen pou yo negosye yon konvansyon kolektif avèk anplwayè yo. Pwosesis sa a ka pran plizyè mwa oswa plizyè ane. Sa lakòz anpil fristrasyon kay travayè yo epi sa anpeche yo jwenn sa yo te kreye sendika yo pou li a, sètadi pase yon kontra avèk anplwayè yo pou defini salè yo, orè yo ak kondisyon travay yo. Se sèlman yon ti kras plis pase yon tyè nan sendika ki fèk òganize yo ki rive siyen yon konvansyon kolektif anvan ennan fin pase.
Pou ankouraje pati yo pase yon premye konvansyon, Julie Su, ki se sekretè tanporè pou Depatman Travay la, te pibliye defi pou premye konvansyon an, kote li mande konpayi yo ak sendika ki fèk kreye yo pou yo siyen yon premye konvansyon kolektif nan lespas ennan. Tou resaman, li te selebre yon premye konvansyon istorik ki te siyen nan lespas ennan. Se BlueBird, ki se yon konpayi ki fabrike bis lekòl, ki te pase konvansyon sa a ak United Steelworkers. Kounye a, li bay lòt konpayi ak sendika yo defi pou yo fè men bagay la.
Sèvis Medyasyon ak Konsilyasyon Federal la (Federal Mediation and Conciliation Service) te mete sou pye yon pwogram pou ede pati yo pase yon premye konvansyon, nan tèt ansanm avèk NLRB. Li te mennen inisyativ sa a nan kad premye gwoup travay Mezon Blanch lan te kreye pou ede travayè yo òganize tèt yo e pou bay travayè yo pouvwa. Se prezidan Biden ki te kreye gwoup travay sa a epi se vis-prezidan Harris ki te prezide l. Anba direksyon vis-prezidan Harris, plizyè ajans ki nan branch egzekitif gouvènman an gentan idantifye epi aplike plis pase 100 aktivite pou ede travayè yo òganize tèt yo e pou ede yo siyen konvansyon kolektif.
Pandan aktivite sa yo ap dewoule, travayè yo ranpòte anpil gwo viktwa nan negosyasyon yo plizyè kote nan peyi a, grasa bonjan sipò yo jwenn nan men administrasyon Biden-Harris la. Kèk ladan yo se konvansyon ant Alliance of Motion Picture and Television Producers ak SAG-AFTRA, ant UAW ak 3 pi gwo konstriktè machin otomobil yo nan peyi a, ant ILA ak USMX, ant sendika pou travayè otèl yo ak otèl Las Vegas yo, ak lòt ankò.
Jan sekretè tanporè Su te di sa lè yo t ap anonse chif yo pou eleksyon ki fèt pou nouvo sendika yo, “Bagay sa a pa yon aksidan. Anba yon administrasyon ki fè tout bagay pou defann sendika yo ak travayè yo, travayè ameriken yo kapab egzèse dwa yo genyen pou yo òganize tèt yo epi yo rive gen yon pozisyon ki pèmèt yo egzije bagay yo te toujou merite yo.”
Lynn Rhinehart se yon konseye sennyò ki ekspè nan kesyon travayè yo nan Biwo Sekretè a.