Se paske fanmi li soti nan zile antiyè yo ki fè li renmen sèvi moun

Non pa m se Samantha Thomas. Mwen se pitit fi imigran ki te soti nan Antiy yo e ki te vin Ozetazini nan ane 1960 yo. Papa m soti nan bèl zile Trinite-ak-Tobago, epi manman soti Karyakou, Grenad, nan zile Grenadin yo.

Tout moun nan fanmi mwen abitye sèvi moun. Se sa k fè, jounen jodi a, mwen suiv tras yo pye pou pye. Gran granpapa mwen te soti Grenad epi li te sèvi nan lame pandan Dezyèm Gè Mondyal la. Granpapa mwen se te yon pwofesè nan lekòl primè nan zile Karyakou. Papa m ak manman m te ban mwen ak de sè m yo yon seri prensip ki chita nan bèl kilti antiyè nou, tankou enpòtans pou n travay di, kreyativite ak devouman pou kominote a. Se prensip sa yo ki te gide mwen nan tout eksperyans mwen te fè pandan lavi mwen.  

Lè m t ap etidye relasyon entènasyonal nan inivèsite, mwen te vin aprann sa eksplwatasyon nan kad travay ak trafik moun ye. Mwen se pitit fi imigran ki te vin nan peyi sa a pou travay e pou jwenn lavi miyò. Se sa k fè mwen te santi m fache anpil lè m te aprann gen moun ki pwofite rèv lòt moun genyen yo pou eksplwate yo. Mwen te fè sèman mwen t ap fè yon bagay pou chanje sitiyasyon an epi mwen te deside al etidye nan fakilte dwa. Pasyon mwen se defann dwa travayè yo. Se sa k fè mwen te antre nan sèvis federal la lè m te kòmanse travay pou Biwo Avoka ki nan Depatman Travay Etazini an nan ane 2010. Mwen te santi m fyè dèske yo te nome m antanke avoka rejyonal pou Depatman Travay la nan zòn Philadelphia nan mwa me. 

Antanke avoka rejyonal pou senk Eta ki nan mitan rejyon ki bò Atlantik la ak Distri Kolonbya a, vizyon pa m se pou m defann ak pwoteje dwa travayè yo san rete, epi vin yon moun k ap bay kominote a sipò li bezwen an.  Mwa sa a, avoka nou yo te jwenn yon jijman konsantman ki te resevwa $4.4 milyon nan men yon konpayi Maryland ki te itilize yon kòb pou peye pou depans anplwayè a te fè olye li te itilize l pou peye prestasyon pou anplwaye yo. Nan sezon lete ane pase, avoka nou yo te travay di epi yo te mennen youn nan pi gwo fabrikan batri nan monn nan lajistis. Jiri a te deside bay plis pase 7,500 travayè yo $22 milyon pou salè yo te sipoze jwenn yo. Se youn nan pi gwo montan yo te bay nan yon jijman pou fè anplwaye yo jwenn salè yo nan istwa depatman an. Ane pase, ekip nou an te fè travayè yo jwenn plis pase $30 milyon. Travay n ap fè a gen yon gwo enpak.

M ap travay pou tout moun respekte lwa ki tabli yo pou pwoteje travayè yo kont eksplwatasyon ak lòt domaj epi pou konpayi yo gen yon kilti ki bay divèsite ak enklizyon anpil valè nan travay la. Konsa, mwen espere fanmi mwen ap fyè de sèvis mwen epi mwen espere jenerasyon k ap vini yo ap kapab travay nan kondisyon ki gen plis egalite. Mwen kontan anpil dèske mwen ka itilize sa yo te anseye m yo, prensip mwen te jwenn nan kilti antiyè mwen ak tradisyon sèvis fanmi mwen pou m dirije rejyon nou an nan travay n ap fè pou pwoteje epi defann dwa tout travayè yo nan peyi Etazini. 

Samantha Thomas se avoka rejyonal pou Depatman Travay la nan Philadelphia.