Ekipman ki adapte pou pwoteje travayè yo

Imajine yon foutbòlè ki antre sou teren an san li pa gen bon ekipman an sou li. Gen risk pou l blese, pa vre? Pwotèj-tibya ak soulye ki gen kranpon se pa annik akseswa yo ye, men se bagay ki esansyèl pou pwoteje li. Se menm bagay la nan lokal kote moun ap travay. 

Ekipman pwoteksyon endividyèl yo (PPE) la pou redui risk ki ka fè moun yo blese oswa tonbe malad nan travay yo. Sepandan, chak PPE pa nan tay tout moun epi li pa p pwoteje moun nan si li pa adapte. 

Youn nan difikilte travayè yo rankontre se jwenn ekipman pwoteksyon endividyèl ki nan tay yo. Anpil fwa, yo pa fè ekipman sa yo pou tout kalite kò, konsa ka gen plis risk pou kèk gwoup moun, tankou fi yo nan sektè konstriksyon an, travayè ki kout yo oswa travayè ki andikape yo. Enstiti Nasyonal pou Sekirite ak Sante nan Travay la (National Institute for Occupational Safety and Health) te mennen yon etid ki fè konnen 41% nan fi yo rapòte PPE yo pa nan tay yo. Sa montre aklè se yon pwoblèm ki afekte anpil travayè e ki pa gen rapò ak sèks yo sèlman. 

Li fasil pou konprann ki efè pwoblèm sa a genyen sou yo. Yon travayè ki gen gan ki twò gwo pou li ka gen difikilte pou l fè mouvman ak men l yo, konsa gen plis risk pou men l yo kwense nan machin li itilize yo. Yon travayè konstriksyon ki gwo ka gen yon senti sekirite ki twò sere, konsa non sèlman li pa p alèz, men tou mouvman l yo ap antrave. Sa ka menm lakòz yon pwoblèm sekirite si sa fè l anvi sispann itilize senti a. Kidonk, yon PPE ki pa adapte pa jis yon enkonvenyan, men li ekspoze travayè yo ak plis risk. 

Se pou rezon sa a Administrasyon Sekirite ak Sante nan Travay la te pase yon règ final pou revize nòm ki anvigè pou ekipman pwoteksyon endividyèl yo nan sektè konstriksyon an. Kontrèman ak nòm ki la nan sektè jeneral yo, nòm pou sektè konstriksyon ki te la anvan an pa t esplike PPE yo dwe adapte ak chak anplwaye ki konsène. Revizyon an egzije pou ekipman yo adapte ak anplwaye ki konsène yo pou yo ka pwoteje kont risk ki genyen nan travay yo.

Kesyon jwenn yon PPE ki adapte se yon kesyon ki la lontan e ki gen rapò avèk sekirite ak sante travayè yo nan sektè konstriksyon an. Depi plizyè dizèn ane, yo kreye pifò ekipman pwoteksyon endividyèl yo pou gason ki gen gwosè ak wotè mwayen. Konsa, tout lòt moun yo oblije mete yon ekipman ki pa nan tay yo oswa ki pa pwoteje yo byen. 

Nouvo règ nou an enpòtan anpil pou korije pwoblèm sa a paske li garanti PPE yo ap pwoteje TOUT travayè yo. Lè yon PPE adapte, non sèlman li bay travayè yo pwoteksyon yo merite a, men tou li ankouraje yo itilize li avèk konfyans pou yo ka fè travay yo an sekirite. 

Jwenn plis enfòmasyon sou nòm sou ekipman pwoteksyon endividyèl la nan sektè konstriksyon an.

Tim Irving se direktè tanporè pou direksyon konstriksyon an nan Administrasyon Sekirite ak Sante nan Travay la.