Yon nouvo vi pou kèk veteran ki te nan prizon

Se pa annik yon bon djòb lame te ban mwen lè m te soti nan lekòl segondè. Li te bay lavi mwen yon sans, li te aprann mwen kijan pou m pran desizyon nan lavi mwen, epi li te fè m rankontre yon seri moun ki te ede m nan karyè mwen ak nan lavi mwen. Anpil nan bon bagay mwen jwi nan lavi mwen, se fòs militè Etazini yo ki fè m jwenn yo. Sepandan, bagay yo pa toujou fasil pou veteran yo. 

Mwen se yon veteran epi kounye a m ap travay nan Sèvis Anplwa ak Fòmasyon pou Veteran an nan Depatman Travay la. Mwen te gen anpil chans dèske mwen te rankontre moun ki te vrèman enspire m. Tou resaman, mwen te fè konesans ak de moun ki veteran menm jan avè m. Yo rele Markus Jolly ak George Nolan.  Byenke yo toule de te apresye tan yo te fè nan lame a, yo te gen difikilte pou yo adapte yo ak lavi sivil. Yo te kòmanse abize sibstans epi yo te vin gen pwoblèm sante mantal. Mete sou sa, yo te fè kèk move chwa ki te lakòz yo pran prizon plizyè fwa. Toule de te jwenn sèvis nan men pwogram tranzisyon pou veteran ki nan prizon an, ki fè pati VETS. Se yon pwogram ki ede veteran ki nan prizon yo jwenn fòmasyon epi prepare pou jwenn yon anplwa. Pwogram sa a bay veteran yo konsèy ak resous pou ede yo devlope kapasite pwofesyonèl yo anvan menm yo soti nan prizon. Temwayaj yo montre jan nou pa janm bay vag sou veteran nou yo.

Markus Jolly avwe li te dezòd anpil lè l te timoun. Nan adolesans li, li te konn abize sibstans epi li te vin gen pwoblèm lajistis. Sepandan, lè yo te voye l nan lekòl militè, li te santi l byen epi li te jwenn yon diplòm GED.  Epitou, li te jwenn bon rezilta nan fòmasyon debaz li te jwenn nan Lamarin Etazini an. Nan premye fwa yo te deplwaye li, yo te asiyen l nan yon bato ki te nan karenay. Sitiyasyon sa a te fè l rekòmanse mennen yon vi ki deregle. Non sèlman li te rekòmanse abize sibstans, men li te fè sa pi mal toujou. Konsa, li te vin kite Lamarin apre dezan sèvis. Apre sa, li te komèt plizyè krim, epi chak fwa yo te kenbe l, yo te ba l prizon pou plis tan. Dènye fwa li te pran prizon, se te twazyèm fwa. Se nan moman sa a Jolly te rann li kont li dwe chanje. 

Olye li te pase tout tan li nan lakou prizon an, li te kòmanse frekante bibliyotèk prizon an. Li te patisipe nan tout fòmasyon li te jwenn epi li te kòmanse bay lòt prizonye yo konsèy. Li te jwenn plizyè diplòm, san wete yon diplòm "associate" nan syans aplike pou twoub abi sibstans ak adiksyon, yon diplòm "bachelor" nan sosyoloji, yon metriz nan administrasyon antrepriz ak yon diplòm antanke asistan jiridik. Epitou, Jolly te patisipe nan pwogram tranzisyon pou veteran ki nan prizon an, ki se yon pwogram ki finanse atravè pwogram reyentegrasyon veteran ki sanzabri a nan VET la.

Kounye a, Jolly ap etidye pou l jwenn yon doktora nan sante konpòtmantal ak yon espesyalizasyon nan jesyon nan Arizona State University pandan l ap travay antanke espesyalis abi sibstans ak sante mantal. Rèv li se pou l ouvri yon pwogram sante konpòtmantal pou ede moun ki fèk sot nan prizon yo reyentegre nan lasosyete. Annatandan, Jolly repran kontak avèk pitit fi li. Kounye a, li tèlman okipe, li pa menm gen tan pou fè egzèsis oswa pou dòmi ase.

George Nolan te genyen 17 lane lè l te antre nan Kò Marin Etazini an. Lè l te timoun, li te konn santi li diferan avèk fanmi li ak zanmi l yo. Lè li t al jwenn Marin yo, li te espere sa t ap pèmèt li santi li fè pati yon fanmi, paske se sa li te vrèman bezwen. Nolan te jwenn yon fòmasyon antanke espesyalis fil elektrik ak fil kominikasyon, epi yo te deplwaye l nan peyi Kowèyt.  Lè l te retounen Ozetazini, li te tonbe nan yon goumen, konsa yo te mete l deyò nan lame a. Yo te bay Nolan yon dyagnostik estrès pòs-twomatik apre ensidan sa a.

Li te jwenn yon djòb antanke bamann nan vil New York kote l te leve a, epi se lè sa a li te kòmanse abize sibstans. Nolan te demenaje Arizona pou l jwenn èd pou pwoblèm abi sibstans li a, men li te komèt plizyè krim epi li te pran prizon twa fwa. Bagay yo pa t bon pou li menm.

Sepandan, an 2018, apre li te patisipe nan aktivite gang nan prizon an, Nolan te kòmanse fè move rèv. Nolan te santi li pa t gen entegrite lakay li. Se konsa li te pran rezolisyon pou l transfòme tèt li. Byenke li pa t konnen ki kote pou l fè, li te konnen li pa t vle rete kote l te ye a.

Menm jan ak Jolly, Nolan te kòmanse bay lòt prizonye yo konsèy epi li te pase ennan edmi anvan yo te lage l nan yon pwojè pou kreye yon pwogram karyè pou sante konpòtmantal. Kounye a, li travay antanke manadjè kominotè nan yon òganizasyon ki pa gen objektif fè kòb. Li ede moun ki te nan prizon yo retounen viv nan kominote a. Nolan ap etidye nan Rio Salado College. Li konn pale nan pòdkas epi li fyè dèske li genyen de pitit pitit. Li chofe anpil pou nouvo opòtinite li wè devan l yo.

Se vre, ni Jolly ni Nolan te travay di pou chanje lavi yo, men tou, yo te benefisye sèvis nou kreye pou veteran yo, tankou pwogram tranzisyon ki rele A New Leaf, ki jwenn sipò nan pwogram tranzisyon pou veteran ki nan prizon an. A New Leaf te ede yo jwenn rad, peye pou transpò pou al travay epi retounen lakay yo, epi ekri CV. Mete sou sa, konseye ki travay pou New Leaf yo te reponn koutfil yo epi yo te rele yo souvan pou pran nouvèl yo e pou verifye Jolly and Nolan te genyen tout sa yo te bezwen pou reyisi nan lavi yo.

Jolly ak Nolan se veteran ki te fè fas ak anpil difikilte, men yo te goumen ak tout fòs yo pou soti nan fènwa. Jodi a, non sèlman yo gen yon bèl karyè, men tou yo kontan travay pou ede lòt moun. Nou menn ki nan VETS, nou fyè dèske n ap ede veteran sa yo e nou kontan anpil lè nou wè jan yo reyisi.

Tonja M. Pardo se direktris pou Oregon nan Sèvis Anplwa ak Fòmasyon pou Veteran an nan Depatman Travay Etazini an.