Yon ti koudèy sou ane a: Senk gwo inovasyon enfòmatik an 2024

Pandan ane ki sot pase a, Biwo Responsab Enfòmasyon an (Office of the Chief Information Officer, OCIO) te travay di pou vini ak kèk inovasyon enfòmatik pou fè bagay pi fasil pou travayè ameriken yo. Men senk bagay nou te fè nan Depatman Travay la pou amelyore teknoloji a an 2024.

• Amelyore ekseperyans itilizatè a sou dol.gov: OCIO ap travay pou plis moun jwenn enfòmasyon nan lang pa yo. Sa gen ladan l tradui enfòmasyon ki sou plizyè sitwèb pou piblik la. Epitou, nou te mete sou pye yon zouti sondaj sou satisfaksyon kliyan an. Zouti sa a pral ede nou jwenn done k ap pèmèt nou pran desizyon ki baze sou sa ou panse.
• Bay sipò pou moun ki depoze demann asirans chomaj: Moun ki mande benefis chomaj yo gen pou voye dokiman pou n verifye idantite yo. Jiska prezan, plis pase 500,000 moun ki te fè demann nan 19 eta te rive voye dokiman sa yo sou yon platfòm dijital GSA ki sou Login.gov oswa grasa yon sèvis nou bay an pèsòn nan biwo postal Etazini yo. Nou te jwenn yon rekonpans nasyonal nan kategori ekselans nan eksperyans dijital la pou efò nou te fè nan sans sa a.
• Vini ak nouvo ka itilizasyon entelijans atifisyèl: OCIO pran angajman pou l itilize entelijans atifisyèl la yon fason ki responsab. Ka itilizasyon nou yo gen ladan yo transkripsyon, wobo konvèsasyon ak fli travay otomatize pou ede ni anplwaye nou yo ni piblik la.
• Deplwaye resous sante an tan reyèl pou moun ki travay nan min yo: An kolaborasyon avèk Administrasyon pou Sekirite ak Sante nan Min nan, OCIO te mete yon nouvo zouti pou jwenn resous sante sou msha.gov ak aplikasyon Miner Safety & Health la, ki gentan jwenn yon rekonpans. Zouti sa a bay enfòmasyon sou etablisman sante, sèvis ak espesyalis ki disponib nan chak zòn. Itilizatè yo ka chèche sa yo bezwen selon preferans yo.
• Modènize entèfas pwogramasyon aplikasyon an: Nou te pibliye plis pase 50 gwoup done ki ouvè atravè API nou an. Kounye a, moun yo ka fè rechèch sou yo sou data.gov. Platfòm done antrepriz nou an pèmèt itilizatè yo jwenn done san restriksyon, konsa yo ka jwenn aksè nan yo epi yo ka itilize yo. Grasa yon seri tablodebò ki pratik ak zouti analiz ki avanse, anplwaye yo kapab idantifye tandans yo, yo ka pran bonjan desizyon epi yo ka predi rezilta yo alavans.

An 2024, OCIO pral kontinye modènize solisyon enfòmatik yo pou bay plis opsyon fòmasyon, pou ede moun yo rete an sekirite nan travay yo, pou suiv èdtan travay yo e pou travayè yo ak retrete yo ka resevwa benefis yo te pwomèt yo.

Lou Charlier se responsab enfòmasyon tanporè nan Depatman Travay Etazini an.