U.S. Department of Labor Blog
Nan yon eleksyon ki te lakòz anpil polemik ki te fèt nan mwa me 2024, te gen anviwon 5,000 moun k ap travay nan faktori Mercedes-Benz nan Tuscaloosa, Alabama, ki te vote pou United Auto Workers of America (UAW) pa jwenn sètifikasyon kòm ajan negosyasyon yo a. UAW te pèdi nan okazyon sa a alòske li te fèk ranpòte yon eleksyon pou sètifikasyon li nan yon faktori Volkswagen nan Chattanooga, Tennessee.
Apre echèk sa a, UAW te depoze yon plent bay Komite Nasyonal pou Relasyon ak Travayè yo kote li te fè konnen Mercedes te itilize yon seri pratik travay ki pa jis anvan eleksyon an. Epitou, pou premye fwa nan istwa a, UAW te depoze yon plent ann Almay kote li te fè konnen yo te vyole lwa alman ki rele Lwa sou Obligasyon Dilijans Rezonab nan Chenn Apwovizyònman yo. Lwa sa a egzije pou konpayi alman yo respekte 11 nòm entènasyonal sou dwa moun yo, san wete dwa pou libète asosyasyon an, lè yo voye travay pwodiksyon yo aletranje. Si yo jije Mercedes koupab, li te ka sibi kèk gwo sanksyon finansye. Plent sa a te pouse gouvènman alman an ouvri yon ankèt sou fason Mercedes te jere eleksyon pou sètifikasyon an epi li te menm fè administrasyon ameriken an enterese nan sitiyasyon sa a.
Mercedes te òganize yon kanpay kont UAW nan peryòd anvan eleksyon pou sètifikasyon an nan faktori li genyen nan Alabama. Rapò yo te depoze bay Biwo pou Nòm Jesyon nan Depatman Travay la fè konnen Mercedes te angaje omwen twa konpayi ekstèn ki espesyalize nan travay ak sendika yo (sètadi Road Warrior Productions, BJC & Associates ak Employer Labor Solutions), epi konpayi sa yo te voye yon douzèn konsiltan nan tout peyi a pou kontrekare efò UAW t ap fè yo. Nou pa p konnen konbyen kòb Mercedes te depanse nan travay sa a toutotan li menm ak konsilta l yo poko depoze rapò yo gen pou yo depoze chak ane yo, 90 jou apre ane fiskal yo fini.
Kontrèman ak sa li te fè nan Alabama, Mercedes konn rekonèt epi kowopere avèk òganizasyon ki menm jan ak UAW ann Almay, menm jan tout gwo konpayi alman yo konn fè sa. Ann Almay, sendika travayè yo jwe yon gwo wòl nan fonksyònman ekonomi an ak sosyete a. Prensipal federasyon sendikal la se Konfederasyon Sendika Alman an (Deutscher Gewerkschaftsbund, oswa DGB). Se yon òganizasyon ki gen ladan l uit sendika ki reprezante 5.7 milyon travayè nan diferan sektè endistriyèl. Non sèlman lwa alman yo defann dwa pou libète asosyasyon travayè alman yo genyen an, men tou li egzije pou konpayi ki gen 2,000 anplwaye oswa plis yo pèmèt anplwaye yo vote pou mwatye nan manm konsèy siveyans konpayi yo. Sa pèmèt travayè yo jwe yon wòl enpòtan nan fason konpayi yo dirije.
Ann Almay, byenke sa ka rive pou yon sèl sendika negosye avèk yon sèl anplwayè, leplisouvan se yon gwo sendika ki negosye avèk yon asosyasyon anplwayè jiskaske yo pase yon akò ki aplike pou tout sektè endistriyèl la nan yon rejyon. An jeneral, ann Almay, yo negosye tarif salè yo, konje yo, benefis yo ak kondisyon travay yo pou tout sektè a ak tout rejyon an. Sa pèmèt tout anplwaye yo ki nan konpayi ki nan menm sektè endistriyèl la nan menm rejyon an jwenn salè ak benefis ki nan menm nivo.
An jeneral, se yon “komite antrepriz” ki jere relasyon ant travayè yo ak ekip direksyon an sou chak sit. Se anplwaye yo ki vote pou moun ki pral reprezante yo nan komite sa yo. Lwa alman yo mande pou tout konpayi ki gen plis pase senk anplwaye gen komite antrepriz lè anplwaye yo mande sa epi komite sa yo sètifye pa mwayen yon eleksyon. Komite antrepriz yo gen yon gwo enfliyans, yo fè respekte lwa sou anplwa yo, yo pwoteje dwa travayè yo, yo angaje nouvo anplwaye yo, yo revoke anplwaye yo selon prensip ki apwopriye yo epi yo menm deside ki fason biwo yo sipoze òganize. Kantite anplwaye ki fè pati komite a depann de kantite anplwaye ki nan konpayi a. Moun ki fè pati komite antrepriz yo pa oblije manm okenn sendika, epi menm konpayi ki pa gen anplwaye ki nan sendika konn gen komite antrepriz.
Nou pa sezi aprann travayè yo te jwenn lòt rezilta poutèt yo reprezante grasa diferan apwòch sa yo. Byenke kantite moun ki manm sendika vin diminye nan peyi Almay, gen plis lontan pase kantite moun ki manm sendika nan peyi Etazini. Karant-twa pousan travayè alman yo travay anba konvansyon kolektif ki negosye, alòske se dis pousan sèlman ki nan sitiyasyon sa a Ozetazini. Grasa wòl sendika alman yo jwe nan ekonomi a, travayè alman yo nan tout sektè yo (kit yon sendika reprezante yo, kit yo pa gen sa) gen dwa pou jwenn 20 jou konje peye pou vakans chak ane, omwen 6 semèn konje peye pou maladi, pou matènite e pou bezwen parantal, ak yon sistèm pansyon ki baze sou kotizasyon, anplis sistèm sekirite sosyal ki anvigè nan peyi Almay la. Byenke travayè ameriken ki fè pati yon sendika yo konn jwenn jan de benefis sa yo, gen anpil moun nan ekonomi a ki pa benefisye sa.
Nan blòg nou pral pibliye pi devan yo, nou prale pale sou wòl sendika yo jwe lòt kote nan monn nan.
J. Matthew McCracken, yon avoka pwosè sennyò nan Biwo Avoka a ki nan depatman an, ap sèvi nan yon asiyasyon tanporè nan Biwo pou Nòm Jesyon nan Depatman Travay la.