U.S. Department of Labor Blog
Tout travayè yo merite bon djòb ak lwa ki pwoteje yo pandan y ap travay. Sepandan, anpil anplwayè egzije pou anplwaye yo siyen kontra ki anpeche yo defann dwa yo genyen yo antanke travayè. Yo oblije yo siyen kontra sa yo alòske sa ka vyole lwa Depatman Travay la fè aplike yo.
Isit, nan Biwo Avoka a, nou abitye wè kontra travay ki gen dispozisyon pou fè travayè yo renonse ak dwa yo genyen yo oswa ki dekouraje yo pou yo pa egzèse dwa yo. Souvan, anplwayè yo rive fè travayè yo pè nan objektif pou anpeche yo defann dwa yo, sitou lè travayè sa yo gen yon koz aksyon ki t ap ka fè yo touche plis kòb lontan pase sa anplwayè a te janm peye yo. Jan sa esplike nan nouvo rapò espesyal nou an sou travay n ap fè pou fè aplike lwa yo, Biwo Avoka a detèmine pou l goumen kont dispozisyon ki ekri ak “ti karaktè” yo, ki se yon seri dispozisyon ki pa legal yo fòse travayè yo aksepte, nan objektif pou ede chak travayè benefisye pwoteksyon ki garanti anba lwa federal yo.
Se pou rezon sa a, nan dat 30 septanm, nou te depoze yon plent kont yon konpayi lojistik ak transpò ki rele Cargomatic Inc. akoz dispozisyon ki ekri ak “ti karaktè” li te fòse travayè l yo aksepte. Plent lan fè konnen ni chofè ki la kounye a ni lòt chofè ki te konn travay pou konpayi a te mennen konpayi a lajistis pou yon seri vyolasyon li te komèt sou salè yo anba Lwa sou Nòm Travay ki Jis la (Fair Labor Standards Act, FLSA). Apre sa, konpayi a te voye lèt bay kèk chofè ki enplike nan aksyon sa a pou fè yo konnen yo te siyen kontra ki te egzije pou yo peye kèlkeswa sa konpayi a t ap depanse antanke defandè nan pwosè a. Sa vle di se travayè yo ki t ap gen pou peye sa anplwayè a depanse pou defann move konduit li te genyen an. Tantativ sa a kontrè ak lalwa. Nan dat 25 septanm, tribinal la te aksepte demann nou te fè pou jwenn yon enjonksyon pèmanan kont Cargomatic Inc. Enjonksyon sa a entèdi konpayi a pou l entimide epi menase chofè ki chèche defann dwa yo anba FLSA epi li anpeche konpayi a fè aplike oswa esye fè aplike dispozisyon dedomajman ki egzije pou chofè yo peye depans konpayi a fè nan aksyon lajistis la.
Mete sou sa, nou pran kèk mezi kont lòt dispozisyon ki ekri ak “ti karaktè” ki trakase nou poutèt dispozisyon sa yo anpeche travayè yo egzèse dwa yo epi yo ka vyole lalwa, tankou:
Dispozisyon ki nan kontra ki egzije pou anplwaye yo rekonèt se travayè endepandan yo ye.
Dispozisyon ki rann travayè yo oswa lòt moun oswa òganizasyon responsab pou vyolasyon anplwayè a komèt yo (p. eg. lè yo egzije anplwaye yo pou yo dedomaje anplwayè a pou domaj tribinal yo mande l peye yo lè li klasifye anplwaye yo nan move kategori a).
Dispozisyon ki di “se moun ki pèdi a ki pou peye”, sètadi kote se anplwaye yo ki sipoze peye sa anplwayè a depanse pou avoka l yo e pou aksyon lajistis la si anplwaye yo pa reyisi nan pwosè a oswa nan abitraj la.
Dispozisyon “rete oswa peye” yo, san wete dispozisyon asistans pou ranbousman fòmasyon yo, ki egzije pou travayè yo peye domaj bay anplwayè yo lè yo soti nan kontra yo bonè.
Règleman konpayi yo tabli pou mande travayè yo enfòme anplwayè yo si gen pwoblèm sekirite anvan yo kontakte ajans gouvènman yo.
Dispozisyon konfidansyalite, dispozisyon ki entèdi pou divilge enfòmasyon ak dispozisyon ki entèdi pou pale konpayi a mal.
Lòt dispozisyon ki nan kontra ki egzije pou anplwaye yo renonse ak dwa legal yo genyen yo.
Objektif nou an se pou travayè yo pa oblije peye yon pakèt kòb bay anplwayè yo jis paske yo demisyone pou al jwenn yon djòb kote yo gen plis sekirite, paske yo te eseye rapòte yon vyolasyon bay gouvènman an oswa paske yo te eseye egzèse nenpòt lòt dwa yo genyen anba lalwa.
Travayè yo toujou gen dwa pou yo rapòte nenpòt konduit ki pa legal bay depatman an epi yo toujou gen dwa pou yo kowopere nan kad ankèt ak aksyon lajistis nou yo, menm si yo te siyen yon kontra prive oswa yon akò abitraj obligatwa. Jan rapò espesyal sou travay n ap fè pou fè aplike lwa yo esplike sa, depatman an ak biwo pa m nan pral kontinye defann travayè yo ak tout fòs nou pou goumen kont dispozisyon ki ekri ak “ti karaktè” yo.
Seema Nanda se avoka pou Depatman Travay la.