Pwoteje tout moun k ap travay pou fèt yo

Sezon fèt la gentan rive, epi anpil nan nou pa ka tann pou n pase kèk moman ki agreyab avèk fanmi nou ak zanmi nou yo, pou n manje bon manje ansanm epi pou n jwenn bèl kado. Men pou sa kapab fèt, genyen plizyè milye moun k ap travay nan jaden, nan faktori kote yo anbale vyann, nan depo, nan makèt, nan konpayi k ap livre koli e nan magazen pou nou ka jwenn tout sa nou bezwen.

Moun sa yo se poto mitan sezon an. Se yo ki pèmèt tout moun souri pandan fèt yo. Sepandan, twò souvan, travay di yo fè a koute yo chè anpil.

Anpil travayè k ap prepare e k ap livre kado nou yo, k ap vann dekorasyon fèt nou yo e k ap fè lòt bagay pou sezon an fè fas ak gwo risk pou yo blese nan travay yo. An 2023, yo te rapòte 170 gwo blesi nan sektè depo ak antrepozaj jeneral la. Sou moun sa yo, genyen 152 ki te entène lopital epi 32 ki te anpite.

Si bagay yo kontinye konsa, anvan ane sa a fini, anviwon 15 moun k ap travay nan depo pral blese grav, 12 moun pral entène lopital epi 3 moun pral anpite.

Sa ki pi grav toujou, se kantite travayè ki ka mouri. Chak jou, genyen 15 travayè ki mouri nan travay yo an mwayèn nan tout sektè yo nan peyi a. Sa vle di genyen anviwon 5,000 moun ki te avèk fanmi yo pou fèt yo ane pase ki pa p avèk yo ane sa a.

Se yon verite ki tris anpil pandan yon sezon ki sipoze bay kè kontan. 

Pèsòn pa ta dwe oblije riske ni lavi l ni sante l pou fè travay li. Nou menm anplwayè, se responsablite nou pou n pwoteje travayè yo. Men kèk bagay ki senp nou kapab fè pou bay travayè yo sekirite nan lokal kote y ap travay yo pandan sezon fèt sa a: 

• Bay travayè yo fòmasyon – Veye pou tout moun konnen kijan pou yo fè travay yo an sekirite, kijan pou yo itilize ekipman pwoteksyon yo ak kijan pou yo jere danje yo. 
• Bay ekipman sekirite – Bay travayè yo ekipman pwoteksyon endividyèl yo bezwen yo, tankou gan, kas pwoteksyon, rad tout moun kapab wè aklè, pwoteksyon pou zòrèy ak kit sekou. 
• Elimine risk yo san pèdi tan – Chèche konnen si gen risk, tankou yon soti ki bloke oswa yon ekipman ki kase, epi repare yo osito sa posib.
• Limite orè travay yo – Yon moun ki fè anpil èdtan ap travay ap vin fatige anpil. Yon travayè ki fatige gen plis chans pou l blese oswa pi mal toujou. Egzamine sitiyasyon kote ou konn manke anplwaye epi prepare orè yo yon fason pou travayè yo ka repoze souvan. 
• Ankouraje travayè yo rapòte pwoblèm yo – Kreye yon kilti sekirite kote travayè yo santi yo alèz pou yo rapòte nenpòt pwoblèm sekirite san yo pa pè pou pèsòn pa fè vanjans sou yo. 

Nou menm travayè, sekirite nou enpòtan anpil. Ou gen dwa pou travay an sekirite. Men sa ou ta dwe konnen: 

• Konnen dwa w yo – Ou kapab refize travay nan move kondisyon si sa mete lavi w an danje.
• Rapòte risk yo – Si gen yon bagay ki danjere nan travay la, fè sipèvizè w konn sa. Si w gen kesyon oswa si w bezwen èd, ale sou osha.gov oswa rele nan 1-800-321-OSHA (6742). Si anplwayè w pa fè anyen pou ranje sitiyasyon an, ou ka rapòte l bay OSHA. Rapò sa a konfidansyèl.
• Pran swen tèt ou – Fatig ka lakòz aksidan. Pran yon ti repo lè ou kapab pou rete veyatif lè w ap travay.

Tout moun gen dwa pou selebre sezon sa a avèk moun yo renmen yo. Pandan sezon fèt sa a, nou ankouraje tout anplwayè yo pou yo fè plis pou pwoteje travayè yo, paske pi bon kado nou ka bay yo ak fanmi yo, se fè tout sa nou gen pou n fè pou yo ka retounen lakay yo sennesòf.

Jwenn plis enfòmasyon sou paj sekirite nan travay la pandan fèt yo sou sit OSHA a. 

Tonya Ford se lyezon fanmi nasyonal la pou Administrasyon Sekirite ak Sante nan Travay la. Suiv OSHA sou X nan @OSHA_DOL ak sou LinkedIn.