U.S. Department of Labor Blog
Annette, Kyle ak Laura te konn travay nan Friendship Diner nan Evansville, Indiana. Malerezman, anviwònman travay la pa t bon menm. Pwopriyetè restoran an te kreye yon anviwònman ki ostil pou anplwaye yo epi li te vyole dwa yo te genyen antanke travayè.
Li te egzije pou sèvè yo pataje tep yo, oswa mete tout tep yo ansanm, alòske se yon pratik ki ilegal anba Lwa sou Nòm Travay ki Jis la (Fair Labor Standards Act, FLSA). Patwon an te meprize nenpòt anplwaye ki te refize pataje tep li yo, alòske se dwa yo anplwaye sa yo t ap defann. Pafwa, patwon an te mande pou sèvè yo pataje tep yo ak anplwaye ki pa t sèvè yo, epi nan lòt okazyon, li te mande pou sèvè yo itilize tep yo pou peye pou frè kat kredi restoran an te gen pou peye yo. Patwon an te refize peye siplemantè pou kèk lòt anplwaye epi li te vè vanjans sou moun ki te gen plent ki lejitim pou li yo.
Men sa Kyle fè konnen: “Nou te konn bay blag epi nou te konn di nou tèlman gen strès akoz patwon an, se twomatize nou vin twomatize.” Se vre, yo te konn bay blag sou sa, men anplwaye yo te sibi konsekans fizik, epi gen plizyè anplwaye ki te menm rive di doktè yo jan anviwònman travay yo a pa t bon pou yo.
Okenn travayè pa sipoze nan yon sitiyasyon kote yo vòlè tep li yo nan men l e kote yo fè vanjans sou li. Se pou rezon sa a Divizyon Salè ak Èdtan an te ouvri yon ankèt sou Friendship Diner. Nan kòmansman ane 2023, yon anketè ki travay pou divizyon an te jwenn anpil enfòmasyon nan men moun k ap travay ak moun ki te konn travay pou restoran an.
Byenke travayè yo te yon ti jan renka pou yo pale avèk divizyon an, epi gen kèk ladan yo ki te pè pou yo sibi plis zak vanjans toujou, anketè a te mete yo alèz.
Men sa Laura rakonte: “Se pa ti travay [anketè a] te fè sou dosye sa a... Mwen vrèman santi m rekonesan dèske [divizyon an] te ede nou jwenn jistis.” Epitou, Laura ankouraje travayè ki nan menm sitiyasyon yo pou yo kontakte divizyon an. Men sa li ajoute: “Si w rapòte yon bagay bay [Divizyon Salè ak Èdtan an], se ede w ap ede lòt kòlèg ou yo tou.”
Lè ankèt la fini, yon tribinal Indiana te òdone pwopriyetè Friendship Diner a pou l peye $390,000 antanke salè ak domaj bay 44 anplwaye, san wete Annette, Kyle ak Laura. Mete sou sa, tribinal la te òdone pou pwopriyetè a afiche jijman sa a anndan restoran an.
Kòb sa a pral ede travayè sa yo peye pou kèk depans debaz yo fè nan lavi chak jou a, tankou pou manje ak gad timoun. Grasa kòb sa a, Laura ap kapab ale nan yon match foutbòl ameriken inivèsitè ak mari li epi l ap kapab peye kou pitit gason l bezwen pou l aprann kondui machin.
Men sa Annette di: “[Divizyon Salè ak Èdtan an] la pou ou epi l ap goumen pou moun ki san defans yo.” Si w panse anplwayè w pa respekte lalwa epi li pa t peye w yon salè li dwe w, ou kapab kontakte Divizyon Salè ak Èdtan an pou depoze yon plent.
Lacey A. Houle se espesyalis kominikasyon kominotè ak planifikasyon resous (Community Outreach & Resource Planning Specialist, CORPS) pou Divizyon Salè ak Èdtan an nan Depatman Travay la. Suiv divizyon an sou Twitter/X, Instagram ak LinkedIn.