Amelyore sekirite ak sante travayè yo nan Sid peyi a

Dorinda Hughes leads OSHA’s new Birmingham region, focusing on worker safety and health for the growing Southern workforce. We asked her to tell us more about the new region and her priorities.

Dorinda Hughes ap dirije rejyon Birmingham, ki se yon nouvo rejyon OSHA tabli. Li bay sekirite ak sante travayè yo priyorite nan Sid peyi a. Nou te poze l kèk kesyon sou nouvo rejyon an ak priyorite l yo.

Di nou ki kote ou soti epi esplike nou sikonstans ki te mennen w nan nouvo travay sa a w ap fè a. 

Mwen se yon fi ki soti nan Sid peyi a. Mwen fèt Alabama, mwen fè etid mwen yo nan yon inivèsite Mississippi, epi mwen te abite Louisiana pandan 26 lane. Se nan zòn sa a mwen te kòmanse karyè mwen nan OSHA, antanke responsab konfòmite a. Nan ane èdmi ki sot pase a, mwen t ap travay antanke administratris rejyonal nan vil Seattle. Mwen pral sonje rejyon Nòdwès Pasifik la ak moun mwen te travay ak yo anpil, men nan kè mwen, mwen te toujou konnen mwen t ap retounen nan Sid la yon lè kanmenm. Mwen jis pa t panse sa t apral fèt konsa! Men franchman, ala yon bèl opòtinite pou m retounen “lakay” e pou m travay avèk yon ekip ki vrèman anvi pwoteje sekirite ak sante travayè yo. 

Poukisa yo te pran desizyon pou yo tabli rejyon Birmingham nan? Ki bezwen ak ki opòtinite ajans lan wè ki egziste? 

Lè OSHA te ouvri biwo rejyonal li sa gen plis pase 50 lane, gwo konpayi yo ak travayè yo pa t menm kote yo ye kounye a. Nou wè plis travay nan Sid la kounye a, konsa travayè yo deplase nan Sid tou. Anpil ladan yo se moun ki pa reprezante ase oswa ki defavorize yo ye. Nouvo rejyon an pral travay pou bay travayè sa yo yon anviwònman travay k ap pwoteje sekirite yo ak sante yo plis toujou, e pou yo gen yon fason pou yo eksprime yo nan lokal kote y ap travay yo. 

Kisa ou plis renmen nan travay w ap fè nan nouvo rejyon sa a? 

Sa mwen plis renmen, se moun yo. Nou te mete kèk pati nan twa rejyon ansanm pou kreye nouvo rejyon sa a. Sa vle di nou gen lidè ki soti nan twa rejyon ak twa diferan fason pou n travay. Sepandan, yo wè nouvo rejyon sa a tankou yon bèl opòtinite yo ban nou. Se yon kokennchenn responsablite, men yo tèlman kwè nan sa y ap fè a, yo tèlman pozitif, yo fè nou tout chofe pou fè travay sa a.   

Ki kote ou panse ki gen pi gwo opòtinite pou travay plis toujou? 

Pou mwen menm, grasa biwo rejyonal sa a nou genyen nan vil Birmingham, n ap kapab kontinye kiltive bon relasyon rejyon Atlanta ak Dallas yo te devlope yo, epi n ap menm kapab etann relasyon sa yo. Genyen anpil opòtinite pou kolabore ak òganizasyon ki enterese nan amelyore sekirite ak sante travayè yo nan zòn sa yo.   

Ki defi ou panse ou pral rankontre nan nouvo rejyon sa a? Kijan ou pral leve defi sa yo?

Mwen te panse se mete twa rejyon sa yo ansanm ki t ap pi difisil. Sa pa gen lontan, nou te òganize yon reyinyon ak tout manadjè yo. Bagay yo te yon ti jan diferan. Nou te fè plizyè egzèsis pou ranfòse ekip la epi nou te travay sou plizyè pwojè yo te idantifye antanke priyorite pou nouvo rejyon an. Lè reyinyon an rive nan bout li, nou tout te gen vizyon sa a: “Rejyon Birminghman nan OSHA – bay travayè yo posiblite pou yo eksprime yo, amelyore kalite sèvis la, trete tout moun yon fason ki ekitab, travay avèk devouman epi aji avèk respè pou amelyore sekirite ak sante nan travay la.”

Kijan ou pral kominike avèk anplwayè yo ak biznis yo pou kesyon sekirite nan travay la nan zòn nan?

Nouvo rejyon an genyen yon ekip ki la pou sèvis kowoperasyon yo. Ekip sa a ap prepare yon plan pou kontakte konpayi yo pou nouvo ane fiskal sa a. Mwen gen anpil chans dèske mwen gen kòlèg k ap òganize plizyè reyinyon avèk gwoup anplwayè ak anplwaye yo nan zòn nan. Reyinyon sa yo pral prepare teren an pou nou aji. Biwo nou yo nan zòn sa a pral kontinye kominike avèk biznis yo epi nou pral chèche antre nan patenarya pou travay nan tèt ansanm avèk yo. Epitou, nou pral kontinye soutni rezo SHARP ak VPP ki nan nouvo rejyon an kounye a.