N ap transfòme asirans chomaj la nan yon Eta apre yon lòt

Pandemi an te fè nou wè kèk pwoblèm ki la depi lontan nan sistèm asirans chomaj la, yon seri pwoblèm ki plis afekte kominote ki defavorize yo. Depatman Travay la detèmine pou l korije pwoblèm sa yo pou elimine tout obstak ki anpeche travayè yo jwenn èd lè yo plis bezwen sa. Prezidan Joe Biden te mete sou pye lwa ki rele American Rescue Plan nan (ARPA) ki te pèmèt Eta yo jwenn 1 milya dola pou amelyore sistèm yo genyen pou ede moun ki nan chomaj yo. 

Nan dat 24 oktòb, mwen te vwayaje nan Wisconsin avèk asistan sekretè pou anplwa ak fòmasyon an, José Javier Rodríguez, pou wè kijan Eta sa a sèvi ak 32 milyon dola lki te jwenn nan kòb ARPA a pou amelyore eksperyans kliyan an ak aksè nan benefis yo. Pandan nou te la, direktè modènizasyon asirans chomaj nou an, Andy Stettner, te dirije yon konvèsasyon avèk asistan sekretè Rodríguez, avèk Amy Pechacek, ki se sekretè pou Depatman Devlòpman Travayè yo nan Wisconsin, ak plizyè reprezantan konpayi ak sendika. Konvèsasyon sa a te selebre pwogrè ki fèt pou modènize asirans chomaj lan nan Wisconsin depi pandemi an epi li te pèmèt nou dekouvri sa Eta a ap fè pou goumen kont kèk gwo pwoblèm ki toujou la. 

Sekretè Pechacek te fè konnen Wisconsin atenn yon rekò nan kantite djòb ki egziste kounye a epi li te pale sou to chomaj la nan kat ane ki sot pase yo. Eta a ap travay di pou modènize asirans chomaj la epi se youn nan premye Eta ki te aksepte pou yon gwoup ekspè ki rele Tiger Teams ede yo idantifye kèk nouvo estrateji pou asirans chomaj la. 

Pwosesis pou aplike pou benefis yo kapab difisil, paske gen anpil travayè ki majinalize oswa ki vilnerab ki pa menm konnen si yo kalifye pou jwenn benefis oswa ki pa konnen fason yo ka aplike pou yo. Jim Chiolino, ki se administratè asirans chomaj la nan Wisconsin, te esplike kèk bagay Eta a te fè pou amelyore sistèm nan grasa kòb ARPA a pou sistèm nan ka pi fasil pou moun yo itilize l: 

• Itilize mo ki senp.
• Amelyore aksesibilite a pou moun ki andikape ki mande benefis, epi
• Tradui korespondans lan, enfòmasyon ki sou sitwèb la ak fòm yo nan lang panyòl, epi tradui lòt enfòmasyon ki enpòtan nan lòt lang, tankou wohingya. 

Brenda Lewison, yon avoka nan Legal Action Wisconsin, te eksprime rekonesans li pou tradiksyon ki fèt nan lang panyòl paske genyen anpil kliyan ki pa pale anglè ki soti Meksik ak Texas e ki ale Wisconsin pou yo jwenn travay. Susan Quam, ki travay nan Wisconsin Restaurant Association, te esplike jan sa enpòtan pou itilize mo ki senp, non sèlman pou moun ki mande benefis yo, men pou anplwayè yo tou.

Lè pwosesis pou voye aplikasyon an fasil, travayè yo ka jwenn benefis epi moun ki kalifye yo ka jwenn peman. Depatman an te pase yon kontra avèk Sèvis Postal Etazini an pou verifye idantite moun ki mande benefis asirans chomaj yo nan diferan biwo lapòs ki patisipe nan tout peyi a. Genyen omwen 17 Eta ki ofri sèvis sa a epi, pi ta nan ane sa a, Wisconsin pral vin youn nan yo.

Pwogram Navigatè a se yon lòt travay nou fè pou ede moun yo jwenn asirans chomaj. Nan evènman sa a, genyen navigatè ki travay pou United Migrant Opportunity Services (UMOS) ki te esplike fason yo ka ede moun ki mande benefis yo yon fason ki pratik pou yo rive itilize teknoloji a epi antre enfòmasyon. Panelis yo te montre kliyan yo gen difikilte pou yo ranpli aplikasyon sou Entènèt yo, menm lè yo gen yon navigatè pou ede yo, epi kliyan ki kominike nan lang siy ameriken yo gen pwoblèm pou kontakte Eta a tou. 

Yo te rekonèt gwo wòl patnè kominotè yo jwe, tankou sendika yo ak òganizasyon ki pa gen objektif pou fè kòb, lè yo ede moun ki mande benefis yo suiv pwosesis la. Pa egzanp, Douglas Bartz, ki travay pou Southeast Wisconsin Workforce Development Board, te di gen kliyan tout laj ki vizite American Jobs Centers yo pou jwenn èd pou aplike pou asirans chomaj sou Entènèt. 

Nan fen konvèsasyon an, panelis yo te repete jan li enpòtan pou kontinye fè travay sa a e pou Eta yo kolabore youn ak lòt. Tretman ekitab, aksè ak eksperyans itilizatè se priyorite yo ye nan kad travay modènizasyon asirans chomaj la. Benefis yo esansyèl pou plizyè milyon fanmi travayè. Pèsòn pa ta dwe neglije. 

Britt Stich se asistan sekretè adjwen pou Administrasyon pou Anplwa ak Fòmasyon an nan Depatman Travay Etazini an.