Kòmanse pran pi bon desizyon anbòch an mwens pase 15 minit

Depatman Travay Etazini an te mete sou pye inisyativ ki rele Bon Djòb (Good Jobs Initiative) pou ede travayè yo jwenn bon travay k ap ede yo avanse nan karyè yo. Sa bon non sèlman pou travayè yo, men pou anplwayè yo tou.

Inisyativ Bon Djòb la gen yon seri prensip ki bon pou anplwayè yo paske yo pèmèt yo kreye kondisyon travay ki ogmante pwodiktivite a e ki fè yo depanse mwens poutèt gen mwens anplwaye ki demisyone. Sepandan, anboche yon moun ka difisil. Genyen anpil pyèj ak obstak ki ka anpeche anplwayè yo jwenn moun ki konpetan pou bon djòb yo ofri yo.

Se pou rezon sa a nou te travay ansanm ak Depatman Komès la ansanm ak plizyè dizèn ekspè, tankou espesyalis nan kesyon biznis ak chèf sendika, pou kreye bwat zouti pou anboche moun selon konpetans yo nan kad inisyativ Bon Djòb la. Jan Mezon Blanch lan te anonse sa jodi a, bwat zouti sa a se yon gid ki fasil pou itilize, ki itilize mo ki senp e ki pratik, epi ki esplike ki sa anboche moun selon konpetans yo vle di ak kijan konpayi yo ka fè sa. Mete sou sa, li rekòmande kèk zouti pou ede konpayi yo suiv prensip anbòch selon konpetans lan olye yo kontinye sèvi ak pwosesis anbòch tradisyonèl la.

Petèt ou te tande pale de apwòch anbòch selon konpetans lan nan nouvèl yo. Jan prensip Bon Djòb yo esplike sa, lè yon konpayi aplike metòd sa a, li bay travayè yo djòb oswa pwomosyon sou baz konpetans, konesans ak aptitid yo ka pwouve yo genyen yo, kèlkeswa fason yo te jwenn konpetans sa yo. Gen travayè ki gen anpil talan men ki pa ka jwenn travay paske pwosesis anbòch anpil konpayi itilize yo limite fason kandida yo ka pwouve yo gen konpetans yo genyen yo. Kounye a, metòd anbòch selon konpetans lan elimine obstak sa yo pou ede travayè yo jwenn bon djòb pou yo ka pran swen fanmi yo.

Anpil moun nan peyi a ap pale sou pwosesis anbòch selon konpetans lan paske li elimine egzijans pou travayè yo prezante yon diplòm. Sepandan, gen plis bagay toujou nan metòd sa a. Etid ki fèt yo montre gen anplwayè ki gen difikilte pou itilize metòd sa a.

Nou te vini ak bwat zouti a pou ede konpayi yo rezoud difikilte sa yo. Bwat zouti a bay enfòmasyon ki klè pou esplike fason konpayi yo ka anboche moun selon konpetans yo yon fason ki efikas.

Sa ki pi bèl toujou, ou ka rive konprann pwosesis anbòch selon konpetans lan an mwens pase 15 minit. Epitou, si w vle jwenn plis detay toujou, ou kapab li tout gid la an mwens pase 20 minit. Si w bezwen kontinye apwofondi sijè sa a, ou kapab itilize lyen yo pou konsilte lòt gid sou pwosesis anbòch selon konpetans lan. 

Pou kreye bwat zouti sa a, nou te travay nan tèt ansanm ak plizyè dizèn moun. Nou fyè de travay sa a anpil paske li pèmèt anplwayè yo benefisye yon resous ki vrèman efikas. Nou te konsilte 15 diferan òganizasyon ki se lidè nan domèn sa a pou fè bwat zouti a pi itil toujou. Kèk ladan yo se anplwayè ak ekspè nan kesyon biznis nan Business Roundtable ak SHRM Foundation, chèf sendika nan AFL-CIO, AFSCME ak NABTU, espesyalis kesyon teknoloji ak talan nan LinkedIn ak Indeed, ak moun ki vini ak nouvo solisyon nan kesyon anbòch selon konpetans lan nan Grads of Life ak Opportunity@Work.

Nou vrèman kontan dèske nou ka travay avèk moun ki ekspè nan tout sa ki gen rapò avèk devlòpman travayè yo ak anplwa a nan monn nan, sitou nan domèn anbòch selon konpetans lan. Dayè, pou kreye pwodui sa a, nou te pale avèk yon seri ekspè ki travay nan Depatman nou an pou jwenn plis konesans nan men yo, tankou ekspè ki travay nan Administrasyon pou Fòmasyon pou Anplwa a, nan Biwo pou Règleman sou Anplwa pou Moun ki Andikape a, nan Biwo pou Pwogram Konfòmite Kontra Federal la, nan Biwo pou Fi a, nan Sèvis Anplwa ak Fòmasyon pou Veteran an ak anpil lòt kolèg ki maton nan domèn sa a. 

Ou kapab li bwat zouti a isit la epi jwenn plis enfòmasyon sou inisyativ Bon Djòb nou an isit la. 

Nick Beadle se konseye pou politik pou inisyativ Bon Djòb la nan Depatman Travay Etazini an.